「人文館：張佬人嘅大本營」

趕功課/ Group Project專區

左手邊有一排玻璃面嘅檯，方便大家傾group project 或者趕assignment！

吹水區

右手邊就有好多梳化同一個茶几畀大家同三五知己一齊吹吹水，打發堂與堂之間嘅時間！

報紙區

每日會有各報社新鮮出爐嘅報紙，第日返到中大得閒嘅時候可以嚟睇下唔同報章嘅頭條，搵下有咩唔同，包你大開眼界！另外，大學線同Varsity同學嘅心血結晶都會放喺common入面畀大家閱覽，數量有限，想拎嘅就真係要快手啲啊！佢哋每篇報道都係十分精采同專業㗎！

福利區：Soc房

Common再行入多少少就會見到我哋嘅Soc房！大家經過見肚餓，就可以入嚟睇下福利櫃有冇零食啱食（比樓上嘅售賣機平好多㗎！）；天地堂唔知點打發時間嘅話，都可以入嚟睇下有咩board game同體育用品想玩想借！雖然話Soc房係院會嘅基地，但院會係為張佬人而存在嘅，咁Soc房都係為張佬人而存在！唔使怕醜，入嚟啦！

信架

出返Common會係一條走廊，而走廊靠牆嗰邊會有一個好多格嘅架，嗰個就係「張佬人信架」，簡稱「信架」喇。每一個張佬人都會有一格，所以，你哋每一個人都會有自己嘅一格！有時Professor會喺信架上面派返assignment畀大家，而更多時會係院會派souven畀大家，所以記得久唔久就去信架睇一睇，check一check有冇嘢攞喇！（有好多張佬人會擺一疊白紙喺度方便自己印嘢，不過小心畀人jam晒呀！）

天台

靜靜雞同你哋講⋯⋯喺人文館嘅天台睇到嘅景色係中大隱藏嘅絕景嚟㗎！日出正，星空靚，以後喺人文館通宵做嘢嘅時候記得要上去睇下喇！（至於點上去，你哋就問下你哋爸媽喇，嘻嘻！）